【2019 DSE】同以往大不同 冇題型 殺技巧 考實力？- 中英通變化分析

最近有唔少人都討論緊今年DSE，有人話係反填鴨，同以往好唔同，什至話變成左一個考實力嘅試。但講到而家，似乎都變左個口號，冇左確實理試嘅分析，淪為比人怨天尤人嘅藉口。



的確，今年dse係有變，但題型依舊，技巧猶在，同考實力更係仲有好遠距離，有d只不過係新瓶舊酒，多層包裝，但本質不變，不如一齊總結下主要嘅爭議，加以分析。

By Dieter

〔中文〕

◆          主要爭議似乎係卷一

1)        諷刺手法 道理深不可測？

一打開卷，見到魯迅嘅文章，或者有唔少人都覺得中伏、奇怪、唔合理，更有人話諷刺手法係「玩」學生，令人睇唔明篇文。但其實，喺閱讀材料開頭，已經提供寫作背景，足以畀考生推敲文章真意。加上，份卷嘅題目已經多次提及諷刺，本來就提醒考生成篇嘢只係一個寓言，真正意思係諷刺某d野，大多亦即同故事表面所述相反之理。題目亦有直接問作者批評每個角色啲乜嘢，變相係話畀考生角色嘅設立，係為諷刺、係為批評；而批評背後嘅道理，早已經喺寫作背景交代。雖然篇文睇落恐怖，但其實四處都係提示。雖然，提供左咁多提示、背景之後，都需要考生嘅一步推敲。但其實以往嘅試卷又何嘗唔係？第九味文中，又幾時有提過係邊一種味道？橋、蕃薯嘅象徵意義，又幾時唔需要考生自己就文本推敲？

2)        兩篇變三篇 時間分配無所適從？

姑勿論試卷分數冇變，頁數類近，時間分配更加本來就係考試技巧之一，更加重要嘅係，質疑者稱自己因為操慣卷，所以面對呢份卷覺得陌生，無所適從。但事實係，有三篇文嘅卷，2019亦唔係第一份，就睇2015，分别有《論趣》《觀沙礫記》同《吾廬記》三篇，第二同三篇有對讀成分，就同今年兩篇諷刺文章對讀嘅情況相似。可見，考三篇從來都唔係咩驚奇新事，只要做過pastpaper嘅都會見過，真係操過卷嘅「考試機器」又點會因此而無所適從？

〔英文〕

◆卷一

1)        B2又深又難？

的確，考評局似乎有意趕走係B1B2猶豫不決嘅人，進一步分grade，所以揀咗同考生最懼怕嘅小說體裁類近嘅自傳，更加入左個人認為有擾亂成分嘅第一部分（個問題學生畀人打過一部分）。 但正如中文一樣，揭開表面之後，謎底其實同以往一樣咁簡單。第一段結構內容比較亂，但問嘅問題都係factual，直接可以抄到。去到第二部分開始進入作者自己嘅成長過程，內容明確，難度同以往相約，亦冇影響理解嘅深字，同以往一樣。（更加比唔上2016B2嘅foodtruck啦:P 原句：“your intrepid correspondent sampled injuria with tilapia from one serving Ethiopian nosh”）用以往嘅技巧、直抄、加少少個人理解，基本上可以答到絕大部分嘅問題，對實力嘅要求唔高。

◆          卷三

1)        Task 4 又快長答又多？

呢個情況其實已經唔係第一年出現。一直以嚟，考評局都係希望可以喺後面嘅task分高下，難度亦一年比一年高，去到1718年相信大家都知道答案長與語速都快，甚至有題目要求考生將成個故事嘅來龍去脈分為幾部分直接寫出嚟（2017skiing on the difficult slope+ride on a tractor），亦有要求考生將一大段野跟錄音默出尼（2018rats play fight）， 以上幾年都顯示成個趨勢。又快又長，本來就係成個考評趨勢，我哋又點能夠奢望2019唔係？有做足卷，按住趨勢充分備試嘅考生，又點會畀佢嚇到？

2)        B2 Email冇Instruction  唔知寫咩？

同樣地，的確表面上係恐怖，但其實亦有蹟可尋，以往嘅技巧，喺揭開表面之後一樣行得通。 今年Task 8同10嘅email冇左內容上嘅指示，但其實亦只不過係將佢搬咗去listening script畀你係notesheet 抄，Task 10 兩個大方句都印左係notesheet ，同樣畀足提示。再者，instruction唔喺email亦唔係第一年玩，以往亦有將確實嘅task放去唔同source（2017 Shopping Mall Task8 個plan for what to keep or not 就去左第二個email個concept art 度），今年只係再試下搬左去notesheet 度，只要將一直以嚟睇email分組織嘅技巧，搬去notesheet到做，其實同往年分別不大。

〔數學〕

◆   小弟數學真係唔好，免得見笑💩

〔通識〕

◆          卷一

1)        政治題爆冷 重出江湖？ 

情況係政治題兩年都未出過，但其實都有兩面睇：兩年未出，或者從此封印；但同時，兩年都冇出，重出嘅機會亦都好大。大家各有各睇，而家事後孔明亦毫無意思。但值得留意嘅係，今次題目嘅設定，根本唔需要對政治好深入嘅認識，無論係邊個分題，都係好大程度上依賴資料提供嘅訊息同指引作答。即使係八分題，都只不過係從資料提取論點，然後延伸推論，對考生個人對政治嘅知識要求唔高，即使真係冇主打溫習、即使真係爆冷，影響亦不大。

2)        好多數據題 要求亦更高

數據題係今年大熱，三題都有，但正正係咁，題型先更為重要，以往嘅數據描述技巧先更能夠大派用場，又何嘗係去形式化、冇技巧可用？同樣地，數據題要求提高亦係有蹟可尋 ，唔係無中生有。睇番2018年第一條（義工人數），考評局喺考評報告已經指出係需要作比較，本來就係今年第三題「數據比較題」所謂新題型嘅雛形，數據含比較點，要求考生指出，亦唔係無中生有。

◆卷二

1)        三題都係比較？

卷二有唔少人覺得易左，但唔覺嘅人主要係話三題都重比較，題型要求高。但只要睇返上年，「全球化促進多於妨礙」一題鬧得熱哄哄，成為關注，本來就係今年重視比較嘅預視。否則，點解考評局係考評會議、考評報告中，要講解要求同出題原則？而其實唔少學校、補習都預示到咁樣嘅趨勢，係測驗、考試、模擬試，都紛紛放入比較元素，今年卷二重視比較，唔應該覺得驚訝。

其實我都係本屆考生，經歷住各位經歷嘅嘢，以上亦只係小弟操卷同應考得得出嘅少少心得同分析。試題的確係有變，但只係新瓶舊酒，背後原則一脈相成，只要拆開陌生嘅包裝，就會見到裏面熟悉嘅內容。我唔係講緊試題同以往一模一樣，考試本來就充滿眾多變數，每一次轉變、每一次變革，難免會影響少部分學生。但今年嘅呢個改變，又係咪同以往出卷模式南轅北轍？真正有做卷，成為自己口中所講嘅「考試機器」，將試卷內容、出題模式、學科知識用「填鴨」嘅方式記住，又係咪真係會因為呢個表面上嘅唔同，而大失方寸？希望未來考生睇到呢度 可以放心，未有重大變革。温書、操卷、揾趨勢、熟練技巧，仍然係致勝之道，同真正考核考試實力仍然有好大距離。但同時亦希望大家明白考試每年都充滿變數，自己嗰年亦唔會例外。